Klaufaskapur samgönguráðherra

Í grein eftir Kristján Möller í Fréttablaðinu í dag eru margar vitleysur. Í fyrsta lagi talar hann um fækkun látinna á hverja milljón ekinna kílómetra. Þegar Kristján talar um milljón kílómetra þá eiga tölurnar við um milljarð ekinna kílómetra. Ekki skakkar nema þremur núllum hjá blessuðum karlinum.

Hann segir líka „ Banaslys í hlutfalli við ekna kílómetra er áreiðanlegur mælikvarði til samanburðar við nágrannalönd“ en hann, eins og svo margir aðrir, gleymir því að í nágrannalöndunum nota margir lestir, strætó og hjól og slíkur ferðamáti er ekki inni í eknum kílómetrum. Það fæst því ekki marktækur samanburður með þessar aðferð.

Alvarlega slösuðum hefur fjölgað undanfarin þrjú ár. Hann lætur það sem vind um eyru þjóta.  Fólk hrinur niður í Árnessýslu af völdum umferðar, hann gerir lítið í þeim málum. Árið 2007 létust 6 þar og 15 slösuðust alvarlega.

Já Kristján, betur má ef duga skal. Eina ráðið sem þú virðist hafa eru stærri og öflugri vopn til handa lögreglunni. Það eina sem þó dugar til langframa er kennsla og aftur kennsla.

Mennt er máttur í þessu eins og öðru. 

Athugasemdir

[Morten Lange, 29.9.2008 kl. 10:17]

Já kennsla er mikilvæg, en ég held nú að stjórnvöld þurfi líka að sýna að henni sé alvara.  Hví ekki fjafesta í sjálfvirkum en færanlegum hraðamyndavélum, settar upp þar sem slysin eru skæðust, og lækka hámarkshraða í 80 úr 90 ?

Alla vega sem tilraun í eitt ár ?

[Birgir Þór Bragason, 29.9.2008 kl. 10:33]

Hafa myndvélar við ljósastýrð gatnamót dregið úr slysum þar? Færa þessar myndatökur okkur meira öryggi? Er það ekki bara eins og að láta laganna verði fá byssur til þess að ná stjórn á dólgslátum í miðbænum. Er það einhver lausn að stækka bara vopnabúrið?

[Morten Lange, 29.9.2008 kl. 12:19]

Gildar spurningar. Þú gætir lagt þá fyrir Umferðarstofu eða Rannsóknarnefnd umferðarslysa.

En mér finnst ekki málefnalegt að bera saman hraðamyndavélar við vopn.  Ef eitthvað má líka við er vopn í umferðinni eru það bílarnir  sem fara um á miklum hraða. Hvað sem er mikill hraði er afstætt, en það er gefið mál að færri mundu deyja og slasast í umferðarslysum ef hraðinn væri lægri ( miðað við að annað haldist nokkurn veginn óbreytt. )

[Birgir Þór Bragason, 29.9.2008 kl. 13:51]

En vélarnar eru til þess að góma brotamenn. Það sem þarf að gerast er að það þarf að koma í veg fyrir brotin,sem oftast eru framin í hugsanaleysi. Sá sem er úti á þekju og fer óvart yfir á rauðu ljósi er miklu hættulegri en sá sem gerir það viljandi og athugandi. Hvor er brotlegri?

[Morten Lange, 29.9.2008 kl. 17:35]

Held að það sé ekkert að því að sekta báðum aðilum.  Skiptir ekki höfuðmáli að fá 100% réttlæti heldur að bæta réttlætið og breyta hegðun til betra vegar. Kennsla í skólum er svo rosalega lengi að skila sér. Og fólk sem er úti á þekju - það er spurning hvort þeim fækki svo um munar ?

En varðandi stóra myndina erum við sennilega sammála :-)