Opið bréf til Helgu Sigrúnar Harðardóttur

Sæl Helga. Þú hafnar því alfarið að samfélagið komi að byggingu akstursíþróttasvæðis. Það gerir þú með vægast sagt undarlegum rökum. Þú segir að ef ríkið komi að slíkri byggingu þá sé verið að svara kröfum manna sem hafa hótað lögbrotum verði ekki farið að kröfum þeirra.

Akstursíþróttamenn hafa í áratugi óskað eftir réttlátri og sanngjarnri aðkomu ríkis að byggingu akstursíþróttasvæða. Óskir þeirra eru mun eldri en þær kröfur sem þú hefur til umfjöllunar í skrifum þínum. Þú ræðst óvart á stóran hóp akstursíþróttamanna, óvart segi ég því þú segir líka að þú hafir ekkert á móti akstursíþróttum. Það að þú hafnar því alfarið að ríkið komi að byggingu akstursíþóttasvæða er að ráðast á þann hóp.

Samfélagið er í skuld við akstursíþróttamenn. Þeir hafa lagt gríðarlega mikið til samfélagsins í formi gjalda af leiktækjum sínum og enn stærra er framlag þeirra til umferðaröryggis. Íslenskir akstursíþróttamenn eru hluti af FIA, alþjóðasambandi íþróttarinnar, og framlag þess til öruggari bifreiða og öruggari vega er næstum því ómetanlegt. Vegna vinnu þeirra samtaka á liðnum árum eru bílar í dag mun öruggari tæki en fyrir 10 árum. Það gagnast samfélaginu. Nýlega hóf FÍB, í samvinnu við samgönguyfirvöld, úttekt á öryggi vega á Íslandi. Það framtak lofa þingmenn. Það á eftir að skila samfélaginu öruggari vegum. Úttektin er runnin undan rifjum akstursíþróttamanna.

Ég skora á þig að auka þekkingu þína á akstursíþróttum, skipulagi og uppbyggingu þeirra, áður en þú ruglar aftur saman íþróttamönnum og afbrotamönnum.

Athugasemdir

[Sævar Einarsson, 24.6.2007 kl. 12:47]

Sæll Birgir.
Er í lagi að ég noti  þetta  bréf á annari síðu ? þetta bréf hjá þér er eins og Ragnheiður Davíðsdóttir sagði svo eftirminnilega "eins og töluð úr mínum munni"

[Birgir Þór Bragason, 24.6.2007 kl. 12:55]

Þér er velkomið að vísa í það enda er þetta opið bréf til Helgu Sigrúnar.

[Atli F (IP-tala skráð) 25.6.2007 kl. 10:11]

Sæll Birgir

Lýst vel á þetta bréf hjá þér og áskorunina um að hún kynni sér málið betur. Margir sem eru á móti því að byggð sér aðstaða fyrir okkur mótorsport áhugamenn hafa engin rök fyrir skoðunum sínum og grípa vitlausar "staðreyndir" úr lausu lofti. En til þess að e-ð verði gert í aðstöðuleysi okkar þurfa akstursíþróttamenn og áhugamenn að standa vel saman og leysa málið í góðu. Ekki að líta á þetta sem e-ð heilagt stríð á milli þeirra sem vilja brautir og þeirra sem ekki vilja brautir eins og málið er oft sýnt í fjölmiðlum.