Fíklar

Kolbrún nokkur Baldursdóttir er fíkill. Hennar fíkn leiðir af sér óendanlega þörf hennar til þess að tjá okkur hinum misvitrar hugsanir sínar á vefsíðum og í blöðum. Hver rót þessar fíknar er veit ég ekki, en klárlega er einhver þörf til þess að meiða aðra, þar undirliggjandi. Í fíkn sinni kallar hún fullkomlega heilbrigt fólk fíkla. Að þessu sinni eru það akstursíþróttamenn. Það er með ólíkindum hvernig umræðan hefur afvegaleitt fólk eins og hana. Í krafti þess að hún er með próf í einhverskonar sálfræði leyfir hún sér að upphefja sig og dæma, augljóslega án þess að kynna sér málin til hlítar. Kolbrún fíkill ræðst á akstursíþróttamenn í grein er hún fékk birta í Blaðinu. Er ég ókurteis núna? Kannski. En mér er í raun sama hvað hún og aðrir sambærilegir fíklar lesa úr þessum skrifum mínum, mér er nóg boðið. Ég mun ekki auðsýna henni né öðrum þeim sem skrifa á þennan hátt neina auðmýkt. Í mínum huga er svona fólk beinlínis hættulegt. Fólk eins og Kolbrún. Fólk sem augljóslega nennir ekki að kynna sér málin en hafa samt skoðanir á þeim.

Athugasemdir

[Sævar Einarsson, 9.7.2007 kl. 02:34]

Ég sendi Blaðinu grein sem var stíluð á þessa konu, greinin hljómaði svona:

Kæra Kolbrún Halldórsdóttir

Með fullri virðingu fyrir þér og þinni starfsstétt þá finnst mér þú vanhæf til að geta fjallað um þetta þar sem þú ert með öðrum orðum að segja að spennufíklar eigi að leita sér sálfræðiaðstoðar vegna spennuþarfar, er lítið að gera hjá sálfræðingum ?  Hraðakstur fær adrenalínið til að flæða um líkamann og veitir fólki útrás og ánægju, sama á við um íþróttafólk, fólk sem horfir á spennumyndir, hlustar á tónlist og svo mætti lengi telja, á þetta fólk að leita sér aðstoðar hjá sálfræðingi til að losna við þessar hvatir ?

Í þínum pistli segir þú meðal annars "En að skattborgararnir eigi að standa straum af kostnaði við byggingu mannvirkja til að auka líkurnar á því að þeir fái að halda lífi og limum í umferðinni er nokkuð langsótt" þá vill ég benda þér á að eigendur vélknúinna tækja borga marga milljarða árlega, meðal annars vörugjald af eldsneyti, tolla af dekkjum,innflutningstolla vélknúinna tækja, bifreiðagjald svo fátt eitt sé nefnt þessi hópur er löngu búið að borga fyrir þessi mannvirki.

Ríkið hefur ekki gert mikið fyrir fólk sem stundar mótorsport, til dæmis byggðu einstaklingar kvartmílubrautina á sínum tíma úr eigin vasa með styrki frá fyrirtækjum. Á meðan fótboltavellir, sundhallir, golfvellir, reiðhallir eru reist og viðkomandi áhugafélög njóta 70-80% opinberra uppbyggingarstyrkja þá þurfti tildæmis Iceland Motopark http://icelandmotopark.com að sækja um lán til byggðastofnun á meðan til dæmis hestafélög fengu styrki uppá 330 milljónir í fyrra og þá eru eftir allar styrkveitingarnar til hinna íþróttafélagana. Ég fæ ekki betur séð en að jafnræðisreglan sé þverbrotin með þessari mismunun og gott ef meðalhófsreglan sé ekki líka brotin.

En hvað er þá til ráða, hvernig fáum við hraðan burt af götunni ? Þessari spurningu er erfitt að svara, það er aldrei hægt að tryggja að hraðakstur verði landlægur, það eru alltaf einhverjir sem koma til með að brjóta af sér þar sem það er bannað, en það er hægt að minnka hraðakstur á vegum þessa lands með því að færa hraðaksturinn á þar til gerð svæði, þ.e.a.s. ef þau væru til en þau eru ekki til. Það er mjög áríðandi að þessum hóp sé ekki mismunað og það er virkilega mikil þörf á að reisa akstursgerði og æfingargerði. Þessi svæði nýtast í svo margt, t.d. er hægt að kenna tilvonandi ökumönnum mun betur verklega hvað hraðinn er hættulegur, fólk með hraðafíkn getur fengið útrás á þessum svæðum, lögregla,sjúkraflutninga og slökkviliðsfólk getur æft sig og leiðbeint öðrum og svo mætti lengi telja. Allt kostar þetta peninga og eigendur vélknúinna ökutækja eru löngu búið að borga fyrir svona aðstöðu, það er alveg tilvalið að fá stóriðjuna til að aðstoða við uppbyggingu á svona svæðum, sem dæmi þá væri upplagt að nýta vinnuvélar við tilvonandi álver og ef netjónabú verða að veruleika þá er hægt að gera slíkt hið sama.

Með vinsemd og virðingu

Sævar Hólm Einarsson
http://easy.is - Taktu því rólega - hraðakstur er ekki þitt einkamál
 

[Sveinn Ingi Lýðsson, 10.7.2007 kl. 13:20]

Eigum við ekki að hafa hana Baldursdóttur. 

[Sævar Einarsson, 10.7.2007 kl. 13:45]

Úbbs, jú er það ekki betra, skil ekki hvernig ég gat gert þessi mistök